Wär kennt nit d Luscht in Lade z laufe
Und sich aifach eppis z kaufe?
Wenn s Porpmonee grad logger sitzt,
Me jo fir s Gäld hart schafft und schwitzt,
lsch s legitim sich ab und zue
Mit Shoppe eppis Neys zue z tue.
Das stillt dr Sehmärz, legt jedi Wuet
Und tuet dr Psyche schampar guet.
Nur kauft me d Sach nit zum verwände,
Mir sinn s ys gwoont alles z verschwände.
Und s neye Zyyg wird gar nie brucht,
Sondern grad in Kaschte gstuucht.
Dert wird s zem tote Kapital.
Konsum – und das isch hit normal –
lsch Birgerpflicht grad ab Geburt,
S ganz Läbe bis zem letschte Spurt.
Dr Wärt vom Mensch kasch mässe dra,
Wie vyyl är konsumiere ka.

Vyyl Mensche hän jetzt d Nase voll
Und finde s Kaufe nimm so toll.
Me sott nit so vyyl produziere,
Dr liberfluss lyycht rationiere.
Me mues dr wältwytt Handel wandle
Und die Dritt Wält fair behandle.
D Ressource sott me besser schoone,
Sunsch tuet sich s Läbe bald nimm loone.
Drum finden e paar schlaui Kepf:
Schluss mit däne alte Zepf!
D Wirtschaft mues me andersch gstalte;
Dä ri ise Bärg an Bsitz verwalte.
Me kennt jo daile, zämme nutze,
Statt ständig sinnlos Gäld z verputze!
Sharing Economy wird s gnennt
So ney, dass s nonig jede kennt!
In däre scheene neye Wält
Goot s jo schyynbaar nit um s Gäld!
E Gmainschaft wird me virtuell,
Dailt wältwytt – s isch ganz speziell!

Nutze isch hit s neye Bsitze.
So blybsch nimm uf dim Plunder sitze.
Sharing haisst s gross Zauberwort
Und wird scho bald zum neye Sport:
So shared die ney Community
So zimmlig alles, wo ka sy.
Do kasch in fremde Better pfuuse
(wenn dr das nit bitz tuet gruuse),
Kasch privat feyn go diniere,
Vo Uber dii lo haim chauffiere.
Wottsch sälber faare, Catch-a-Car.
Kasch Klaider leene und sogar,
Wenn d aine bruchsch, e Boorer sueche
Und en denn grad online bueche.
Im Gegezuug bietsch eppis aa,
Wo dä mit Boorer bruche ka.
Im Ussland zaigt dr ain si Stadt.
Eso isch s Raise bsunders glatt!

Wärsch bi däm Spiil au gärn drby,
Kasch Mikrounternäämer sy.
Le capital – c›est moi! hersch s sage.
S letscht Hemmli dailt me, ooni z klage.
Me macht dodruss au gar kai Heel.
Wenn s syy mues dailt men au sy Seel!
Wär nyt bsitzt und numme nutzt,
Dä läbt balaschtfrey, gstrählt und putzt.
Fascht scho poschtmateriell!
Nur, d Exischtänz wird kommerziell ;
S Läben e Produggt zum handle
Und meegligscht schnäll in Gäld z verwandle.

D Idee vom Daile wäre Hit!
Nur: Edelmuet git s drotzdäm nit.
So mues fir alli umsbedinge
Immer eppis uusespringe.
In däre scheene neye Wält,
Draait sich halt glyych alles ums Gäld.
Wär wirgglig s grosse Gäld duet scheffle,
Sin die, wo an de User schniffle.
Big Brother tuet Big Data sammle.
Kai Chance, s Web kasch nit verrammle.
Virtuell bisch fuudiblutt
No vor de s merggsch, sin d Date futt.
So dailt me quasi d Katz im Sagg,
Vergit sy Seel däm Lumpepagg.

S Konzäpt, dass alles allne gheert,
lsch nit ganz ney. Was jetzt dra steert:
Es wird mit Gmainschaftsgfyyl beworbe,
S Syschtem drhinter isch verdorbe.
Dr Kommunismus isch eso
Ganz noodisnoo zer Waar verko.
Das het är aber gar nit tscheggt!
lsch qualvoll uf em Märt verreggt!
S Kapital lacht sich e Schranz,
Tanzt wytterhyn sy Häxetanz!